首先要講吓原訂嘅行程，係如下:
磐梯熱海 > 豬苗代湖 > 磐梯山ゴールドライン(收費公路) > 五色沼 > 磐梯吾妻レークライン(收費公路) > 磐梯吾妻スカイライン(收費公路) > 磐梯熱海
要提出嘅原因係最終我係行唔晒成個行程，切合番個命題。
(至於上面提及嘅三條收費公路，其實大有來頭，係由縣政府特別設立嘅觀光公路，重要只係4-10月開放，咁當然唔可以浪費架車㕸！)
步入正題
自遊行嘅最大好處，對小弟來講，就係唔駛朝朝早晨咁早起身趕行程。來到溫泉旅館，雖然係夏天，都要浸多幾次！
呢間紅葉館特別之處，係除咗必然有嘅大浴堂外(如果唔係點叫溫泉旅館呢？)，樓上重有兩個家庭浴堂，可以自己(或者一家人)問職員攞鎖匙，跟住鎖埋門慢慢 。一個係石湯，一個係木湯。晚黑重方便，自己鎖埋就浸得。
不過以小弟愚見，都係浸大浴堂先至夠氣氛，起碼隻腳可以伸直d！而大概呢個唔係旺季，住客人唔多，而且全部都係當地老人家，家庭浴堂完全無人用，就算大浴堂都唔多人。問准旅館主人後，可以幫大浴堂拍幾張相。其實間旅館唔大，所以浴堂當然亦無跟團去果d咁大。
之前做過功課，知果三條收費公路路費唔平，小弟搵來搵去，先搵到有観光有料道路３ラインセット券(即係類似一次過俾晒嘅優惠 )，都要2700yen。旅館主人建議磐梯山ゴールドライン可以不去，因為係山路，景色相對較遜色，而且亦較國道115難揸，而另外兩條磐梯吾妻レークライン同埋磐梯吾妻スカイライン，就幾值得去，所以我都更改咗行程。先去豬苗代湖，再行115國道去五色沼，再行埋磐梯吾妻レークライン同磐梯吾妻スカイライン兩段。
不過浸吓又me me mo mo吓，都要十點先出發，第一個要去嘅，其實係尋日已經經過過嘅豬苗代湖。此湖被稱爲日本第四大湖，猶如天鏡把磐梯山的英姿映照在湖面上，因而也被稱作“天鏡湖”(抄至日本國家旅遊局網頁)。
我之前已經預計無論時間上，或者團友嘅興趣上，遊覽船都唔會係項目之一㗎嘞，惟有見兩隻船一齊喺碼頭時，幫佢地拍張合照啦。
唔遊船河其實重有其他節目嘅，我就選擇咗都喺湖邊嘅野口英世紀念館。如果唔知野口英世係邊位，攞張1000yen紙出來就會見到佢。佢係一位好出名嘅醫學家，對防治黃熱病做出好大貢獻，重因為研究中感染黃熱病而客死異鄉。呢度係野口先生嘅故居，而喺會津若松重有一個野口英世青春館，有興趣可以去埋。
野口英世紀念館對面重有一個玻璃博物館同埋啤酒館，其實都係for遊客shopping類嘅東西，當然如果你d朋友對野口英世無咩興趣，就可以去參觀一下，因為既唔駛入場費，重有冷氣嘆添。
咁行吓，周圍影吓相，原來差唔多12點。原本嘅行程就係去五色沼。不過一來我唔肯定車程要幾耐，二來唔肯定途中有冇飯食。橫豎尋日去唔到「源來軒」，咁今日去番另一個旅遊書推介 - 會津若松市嘅なかじまホームページ，食味噲飯補返數啦！
不過呢間嘢個門口得丁屎咁大，我要兜咗三個圈，再派出一位勇敢嘅團友做偵察兵，先至確定到佢個位置，原來喺一間酒店嘅隔離。
成個餐牌嘅嘢兩隻手嘅手指差唔多數晒，不過呢個正係好多日本古早食肆嘅特色，味噲豬扒飯真係好好味，值得推介。
飲飽食醉，去埋隔離便利店買雪糕，又差唔多1點幾。咁就再出發啦，先先去一度旅遊書介紹，叫「昭和之森」嘅地方，據稱係欣賞豬苗代湖最好嘅地方，不過GPS就指咗去一個貌似campsite嘅神秘地方，應該係電話號碼錯咗嘞。
不過錯有錯著，原來果度好快就可以走番去115國道，話咁快就去到五色沼嘅昆沙門沼嘞。
五色沼嘅命名係因為佢嘅湖水會呈現唔同顏色，肉眼都可以好清睇到。
大家從上圖應該見到有朋友泛舟湖上，我估真係一個字「爽」。不過團友們對呢樣無咩興趣，又係惟有下次再來先啦。
五色沼係火山爆發形成的小湖，呢d湖嘅特色係通常好細，同埋往往一連串出現。呢度有將幾個沼串連成一條「探勝路」，或者簡單d講係一條行山觀光嘅路線，好多小朋友行，沿途「konichiwa(即係『午安』或者『您好』)」之聲不絕於耳。
行入少少，已經係另一番風光。
其實路程唔係好長，但最大問題係︰行完之後要點走回頭路攞車呢？所以大家好快有共識，就係行一小段就返轉頭。跟住再揸車去埋探勝路嘅另一邊，就係柳沼。不過如果有興趣行山嘅話，周圍重有好多遠足路線，應該可以行一至兩日。
中間會經過一個磐梯山噴火紀念館，如果對火山有興趣不妨一看(咁所以我就入咗去睇嘞)。
紀念館屋頂有個瞭望台，係睇磐梯山嘅好地方，據資料講中間凹入去嘅位置，其實係之前火山口嘅位置，係十九世紀爆發後塌陷咗。
紀念館過五分鐘車程就去到柳沼。柳沼比昆沙門沼細，不過風景其實都唔輸蝕。
柳沼隔離就係檜原湖，係呢區另一個比較大嘅湖，同豬苗代湖一樣都有遊覽船坐。
有幾位著咗浴衣(即係好似和服果隻)嘅美少女晒度睇風景，咁當然要謀殺一吓張記憶咭(呢句以前叫謀殺菲林，而家聽返其實幾老土)。後來發現，原來佢地都係小models嚟嘅。
不過小models出現喺度，其實係有道理嘅。事關當日原來係唔知咩咩祭(對唔住，其實有張單張，不過已經唔見咗)，除咗浴衣美少女，重有攤檔同埋有樂隊表演。而且夜晚重有煙火表演添！...不過，眾位團友開始出發疲態嘞，要等多三四粒鐘會有d難度，而且之前已經喺旅館訂咗定食，所以又係果句︰等下次啦！
走返去停車場時，見到果架觀光穿梭巴士，都幾得意，不過班次就好疏。
好嘞，大家會發現之前提過果三條收費觀光公路，原來係一條都未行過，就已經成5點幾！本來，返去旅館係可以行磐梯山ゴールドライン(即係旅館主人唔建議行果條)，不過大隊決定要行番115國道，原因就係︰
有部份團友來時，見到沿路買桃嘅攤檔，好似好吸引咁，於是想回頭買d。不過原來平嘅唔靚，靚嘅唔平(有d成2-3000yen四個)。結果都係無收獲，不過其實115國道風景都唔差㗎。
之前講過唔留喺檀原湖睇煙花，其中一個原因係訂咗旅館嘅定食。通常呢d旅館嘅餐都好正，我點都會預留一餐嘅。
咁煙花就惟有自己去便利店買，去附近公園放啦。
--全程完--
感想:
今次又係預計去好多地方，點知一半行程都無行晒，呢個「眼闊肚窄」嘅情況在小弟自遊行生涯中，其實已經出現過無數次。不過小弟第一次遠行時係無出現呢個情況，果時係去歐洲，結果12日行咗6個國家，都咪話唔充實，不過就去辛苦，而且有些少跟團果隻走馬看花嘅感覺。於是之後去旅行，我都係會每個地方留耐d，寧願大家覺得悶，鬼叫自己年紀大咩？
當時選擇嚟磐梯山，其實係無咩idea，主要係去咗仙台後，想在東北揾另一個地方行行，最初我嘅目的地係岩手縣，不過除咗小岩井農場以外又諗唔到有咩好去。於是不如近近地落返福島縣再算。而家再諗，呢樹真係俾我有d驚喜，風光優美，人又唔多，真係有少少瑞士feel！完來兩日其實係唔夠嘅，所以之前話「等下次」唔係吹水，我一定會努力達成目標嘅。
