命題︰失敗的一天
磐梯山位於福島縣中心，小弟選擇咗由郡山市租車自駕，遊玩兩日。由仙台乘坐新幹線前往郡山，約需50分鐘。
今晚同明晚的旅館︰位於磐梯熱海的紅葉館。磐梯熱海顧名思義，係一個溫泉勝地，周圍都係溫泉旅館，只係夏天來呢度，其實有d可惜呢。
(由郡山去磐梯熱海只係需時約40分鐘車程，但磐梯熱海去磐梯山其他景點就比較耐，所以如果自遊行，我會建議住中心點會津若松附近。至於小弟反而選呢度，主因係為咗慳錢，租架細d嘅車，可以快d放低行季而已)。
有趣嘅係個旅館係以貓作為logo，但主人其實無養貓，反而養咗一隻狗。
個車庫....唔知點解我唔係好敢泊，總係怕地震時會....
第一個景點當然係磐梯高原中心城市 - 會津若松 - 嘅名勝鶴ヶ城。
(注意︰呢張只係網上圖片)揸咗大半個鐘車，終於到嘞。登登，一去到....點解變咗咁㗎？
原來因為大裝修緊，有冇搞錯！最慘係前幾日去東京淺草寺時，又係裝修喎！
(數日前東京淺草寺圖片)去日本度度都要收錢，呢度當然唔例外，全票除咗入天守閣，重包括呢個麟閣，應該係一個茶居，不過小弟對日本文化唔熟，所以唔係好識欣賞，兩野就行完，但就見到有幾位男女行到唔捨得走。
鶴之城個城堡 - 天守閣就幾有趣，裡面其實已經變咗博物館。大家一邊行，一邊可以對應番亞視果套「篤姬」d劇情(當然要強調其實唔係太有關係，欲知詳情，請自行參閱日本歷史書)，由於裡面唔可以影相，所以no photo。至於佢裝修緊亦有一個好處，就係可以近距離觀賞城頂上果對唔知咩嘢(sorry，得罪晒，好似係叫金鯱)，因為裝修，拆咗佢地落嚟，順便展覽一吓。
會津若松其實重有其他可去之處，比如飯盛山，白虎隊(唔係小虎隊，如果想知係咩，可以請教熟明治維新歷史嘅朋友，或者係日劇迷)等，不過小弟無咩時間，所以惟有下次先嘞。
第二站就係會津鐵路芦ノ牧温泉站，睇吓d火車班次咁疏，就知個站唔慌大啦！
點解要來？因為係呢度個站長係一隻貓來的。
(摘自會津鐵路網頁，因小弟仍未有幸見到站長本尊)
不過貓站長唔知去咗邊度蛇王，貓影都唔見(根據小弟以極有限日文同站員溝通所知，呢位站長係好難見到真身㗎)，我哋只好喺站長室(即係貓竇)度影張相，同埋買番d紀念品就草草收工嘞。
第三站係大內宿，由於今日太遲出發，去到已經接近五點，呢度已經收咗工。(惟一好處係停車場都收咗工，慳返泊車錢)。
(沿途都是咁樣嘅單線雙程行車路，只是往大內宿就係較斜及多彎)
不過呢度出名，係因為保留咗江戶時代市集嘅風味，所以人多返而唔好行。而家人少少，周圍行吓，其實都幾舒暢。只係所有舖頭都關咗門，想買紀念品同食嘢(比如最出名嘅大蔥蕎麥麵)都唔得。
大蔥蕎麥麵(都係得網上圖片，來自MBT日本)由小山坡個神社影番落嚟，同旅遊書都有幾分相似呢！
最後一站係喜多方，呢樹以拉面出名，於是我就計劃嚟呢度食拉面當晚餐。旅遊書介紹咗喜多方拉面嘅元祖「源來軒」(可以參考來自UTravel嘅介紹)，但去到先發現星期二係休息嘅(UTravel資料係錯嘅，不過其實旅遊書有講，只係自己一時不察，激死！)。結果惟有喺路邊是但選一間，就選咗呢間，根據資料，應該係一間連鎖站來嘅。
不過呢樹都有個好處，就係有個幾大嘅停車場(源來軒門口只有一塊爛地，重應該係隔離屋嘅，泊車真係幾R頭，但官網話有停車場嘅)，另外紙製餃子模型幾有趣，所以我都幫襯咗一客。
返到旅館，原來已經九點(喜多方同磐梯熱海一個東一個西，車程要超過一個鐘)，跟住當然要享受呢個旅館最大的優點︰就係果個溫泉浴場啦！(咁當然係無相啦，不過其實下次係會有的，敬請追看！)
呢架旅館重有一個「特色」，就係除咗日式房外，亦會有洋式「半雙人房」(semi-double)，不過唔知點解我果間變咗係雙床房(twins)？明明旅館網頁係無㗎！
第二日嘅行程待續...
感想:
其實命題已經講咗，今日完全係失敗嘅一日，因為原先計劃去嘅地方，全部都出現一d狀況。不過我諗作為自遊客，好多時都要有呢個心理準備，當然做好d準備會好d，不過有d意外真係好難避免。呢個時間，就惟有調整自己嘅心態，其實呢d不完美，都會係回憶嘅一部份。第時諗返起，可能呢d遺憾，會比你更深刻嘅印象呢。
記得有個故事講有位小和尚打爛咗師父嘅盆栽，不過師父無鬧佢，因為師父話佢種盆栽係要陶冶性情，唔係要令自己發脾氣。我諗旅行嘅原理都係一樣，成日聽到話一班朋友去完旅行後會無friend做，甚至夫婦旅行後搞到離婚，會唔會有d本未倒置？
小貼士:
1. 呢區其實頗適合自駕，最重要是公共交通真係唔太方便，尤其去五色沼一帶(下次會講)，只有疏落嘅觀光巴士。不過呢度有好多路係無街燈嘅，所以唔擅㨁夜車嘅人就要比較小心；
2. 如果有特定食肆想去，一定要check清楚人哋休息嘅日子(好似今次講呢間「源來軒」同下次會講果間「なかじまホームページ味噲飯 」，都係休星期二)，另外有部份食肆會好早就關門㗎嘞(試過有次喺函館，有間好出名嘅食肆係收6:30pm！)；
3. 印象中沿途油站唔太多(尤其離開磐梯熱海後)，不過路程唔太長，如果在郡山入滿油先上山，應該可以應付全程。至於自駕要注意嘅嘢太多，遲吓一次過出一個post講好d。
附錄: 有用資料網站:
磐梯熱海溫泉 http://www.bandaiatami.or.jp/
紅葉館 http://www.kirakuya-inn.co.jp/global/twelcome.htm (有中文版的！)
鶴之城 http://www.tsurugajo.com/turugajo/shiro-top.html (會津若松觀光公社)
會津鐵路 http://www.aizutetsudo.jp/index.php
會津鐵路紀念品站 http://www.aizutetsudo.jp/shop2/ (內有大量貓站長的東西)
大内宿 http://www.fukutabi.net/fuku/oouti.html
喜多方 http://www.kuranomachi.com/
沒有留言:
發佈留言