命題︰攝時間之旅
完成日本東北之旅後，由於我哋會留喺東京一段時間，市區shopping已經去咗好耐，都xx痕想去去近郊地方。本來我計劃去輕井澤，不過一來覺得兩日唔太夠，二來果邊比較貴，三來亦比較熱門，唔啱我呢d自命清高嘅人，所以最後我選擇咗房總半島︰一個我之前完全未聽過嘅地方。
房總半島位於東京灣畔，屬於千葉縣，其實地方都唔細，而且景點非常散，景點分散喺館山市，鴨川市，銚子市等。由於我哋只會留兩日，而且已經疲憊不堪，所以只諗住喺近東京果面，即係君津附近走一走。由東京去君津，坐京葉線轉內房線，大槪一個鐘多d就到。
內房線有呢款懷舊樣嘅電車，只係唔知點解最後都係無機會坐到
其實旅者去呢度多數選擇住蘇我，因為果度係京葉線轉車站，又或者係住木更津。原來君津真係唔大，市區得果五六個街口，只有超市、藥房、同埋100yen店各一(小弟最後全部都參觀同幫襯過)。至於近火車站嘅酒店只有三間，我就選擇咗Grand Ex君津，原因係一貫嘅︰平。8000yen一間semi double包埋早餐，間房細些少都無咩好埋怨law。而且間酒店嘅外貌都幾ok㗎。
其實我來呢度最重點嘅項目係Mother Farm，我已經計劃咗係第二日去。之前我亦做過功課，知道呢間酒店有特價門票賣，另外君津駅每日有班巴士去Mother Farm(註︰以上資源要睇酒店嘅日文網頁先有)，於是check in後當然首先要買飛，另外請職員幫手訂巴士位。雖然呢度d職員大多唔太識英文(日本普遍情況)，不過就十分熱情，重同我哋交換香港嘅情報。
由酒店房影落去，君津市真係一眼望晒咁大
Check in完搞晒所有嘢，已經下午一點。咁我哋就有一個下晝無搞作，於是我決定去最近呢樹嘅景點︰鋸山。
睇地圖鋸山同君津好近，不過其實要坐內房線8個站去浜金谷駅先到。內房線班次相當疏落，每個鐘一般只有一至兩班車，所以坐車前最好先攞定班次表，夾好時間。去到之後沿海邊馬路行10分鐘，就去到鋸山ロープウェー纜車站。
纜車車費900yen來回，每程都坐唔夠5分鐘，咁諗番昂平360真係非常抵。當然你可以話呢度有位阿姐會沿途講解，不過我除咗「Sayonara」外就完全聽唔明白。
山上嘅纜車站有個小餐廳，同埋一間小商店賣零食及紀念品，重有一個小小嘅展覽廳，介紹呢區開採嘅石材同埋工具等。據資料話千葉嘅城堡d石頭都喺呢區開採嘅。
不過最必遊嘅纜車站係個天台，因為可以俯瞰東京灣嘅風光。
坐纜車當然係為咗遊山(無得玩水)。出乎我意料之外，除咗纜車果900yen外，原來重有600yen洗費，就係日本寺嘅入場費，因為差唔多成個景區範圍都喺呢間寺入面(無奈中)。重有由纜車站行去西口管理站入口，要行一段山路，雖然唔係長，但d路都頗爛，不過我又見到有幾位日本wet妹，著住3寸高踭鞋都行到wo。(因為佢地身邊都有個大隻男旁住，所以我都唔敢影相嘞)
事緣最後一班落山纜車開下午5點，時間非常唔夠，而且天時暑熱，大家都唔願行，於是600yen入場費只係睇咗山頂部份嘅幾樣嘢︰
百尺觀音
呢幅唔係相機壞咗，而係百尺觀音後面有個位，響兩座山嘅隙縫，係影地獄のぞき最好嘅位置。
地獄のぞき(呢個可以話係呢區嘅地標)
十州一覽台
因為又要夾番電車班次，所以四點廿分就要落山。886鋸山。
(其實如果時間充裕又唔係太熱，可以考慮坐纜車去到山頂，再行番落山，咁可以慳番400yen纜車費)
沿路返回浜金谷駅段路，大陽依然高高掛。
浜金谷駅個站完全無閘機(除咗Suica機)，如果買普通單程票就要人手剪票。當然亦唔會有電梯，好有懷舊feel。
返到君津，其實都已經差唔多六點。晚黑就拍拖行吓君津市，去晒果d超市藥房便利店，好休閒。順帶一提晚餐去咗日本三大牛肉飯連鎖集團之一Sukiya食(另外兩大 - 松屋同吉野家之前喺東京已經食過)，係我喺日本食牛肉飯最感滿足嘅一次(純屬個人意見)。
第二日嘅行程待續...
感想︰
其實都無咩感想，最主要嘅感想就係「貴」。因為去一去鋸山，纜車(900yen) + 日本寺入場費(600yen) + JR來回(400幾yen)，每個人差唔多2000yen。值唔值就真係見人見智。
不過又諗番，去日本旅遊本身就係貴。只係點解大家重係前仆後繼呢？點解大家洗住錢重係心甘情願呢？相反點解行香港或者國內嘅地方，明明便宜好多，大家又會有被揾笨嘅感覺呢？呢樣其實係咪更值得大家，尤其係服務性行業嘅朋友參透一吓呢？
沒有留言:
發佈留言