講開仙台，我嘅第一次「接觸」係2000年第一次去日本旅遊(唔係第一次去日本，因為第一次去係有關野外定向嘅)，係跟團嘅。果時個領隊有講話香港人去東京大阪已經有d厭，開始會去一d比較冷門嘅地方，佢當時就推薦咗仙台。不過自己都想像唔到，我會喺十年後先去，而且係自遊行。
命題: 匆忙的半day仙台市遊
好嘞，返回正題。
雖則香港去仙台嘅直航機已經復航。不過由於團友們先要去東京玩一輪(部份團友之前未去過日本)，所以仍用「傳統」嘅方法去，就係坐東北新幹線。
由東京開往東北方嘅新幹線，喺東京只會停東京同上野兩個站，於是我決定之前住喺上野，而唔係新宿或者池袋(東京站附近更難揾中下價住宿)。最後揾到呢間Sutton Place Hotel，semi-double房11000yen連簡單早餐(面包+飲料)，其實唔平，不過比Super Hotel近火車站，而且早餐並唔係好似傳聞咁要搶，份量都算幾足夠嘅。
(值得補充嘅係呢間酒店有投幣洗衣機同乾衣機，對我哋呢d人真係好有用，可以帶少套衫褲)
坐新幹線由東京去仙台，車程大約100分鐘，話長唔長話短唔短。不過由於我哋係坐係呢架雙層列車嘅下層，於是就咩風景都睇唔到(所以之後預約我打死都話要坐上層)。
仙台第一日我哋只有一個下畫喺市區行吓，最好就坐呢架るーぷる仙台行一個圈。600yen一張全日pass，基本上坐三程已經抵返(單程250yen)，所以真係好難諗點解唔買。
不過最後一班るーぷる仙台係16:00由仙台駅開出，呢樣我覺得真係有d匪夷所思。即係話下畫四點幾就要玩完走嘞。
我哋第一站係瑞鳳殿，呢樹就係供奉伊達政宗嘅地方 (仙台城係由伊達政宗呢個藩主創建，所以成個仙台都有好多有關伊達政宗嘅嘢)。
值得一提係最出名扮演伊達政宗嘅，就係有份演出「最後武士」同「潛行空間」嘅日本影星渡邊謙。而我哋呢次喺日本期間，正正係「潛行空間」喺日本上演之時。
由車站行去入口要經一條大斜路再加長樓梯，同行部份團友決定唔入去，慳返500yen入場費。
不過沿路行會見到好多美麗嘅花球，可以試吓問人借返嚟果支50mm定焦鏡。
由於我見當地人都好少響呢度影相，所以自己都只係影咗好少相。
第二站(亦已經係最後一站)係青葉山公園，呢樹亦係仙台城嘅遺址。呢個城最特別嘅地方係無天守閣，因為政宗唔想被當時嘅大將軍德川家康猜忌。所以呢樹無宏偉嘅城堡睇，不過就係眺瞰仙台市嘅好地方。
青葉山公園有伊達政宗的騎馬像，重有一個紀念甲午戰爭同日俄戰爭陣亡士兵嘅紀念碑。我無意再回憶起呢段叫中國人心傷嘅歷史。但撫心自問，嚟呢度嘅香港遊客，有幾多個會記得呢兩場戰爭呢？
呢樹重有一個青葉城資料展覽館，同埋有一間護國神社，不過我哋無咩時間，只係好快行咗一個白鴿轉。同埋去隔離買咗d小食。
要趕最後一班るーぷる仙台巴士嘞。
難得嚟仙台，當然要試當地名物牛舌料理啦。旅遊書話仙台駅三樓嘅牛舌通任何一間都ok。但我哋五點半去到，任何一間都已經大排長龍嘞。
至於你問我點解最後選呢間伊達の牛たん，就係因為晏畫去時，見到好長條龍，不過夜黑再嚟條龍又無咁長wo，咁感覺上好似賺咗。不過後尾我先知到其實牛舌通果四間都係連鎖店，即係如果怕等又唔介意，亦可考慮其他分店。
牛舌料理小弟本身都幾好，不過都會覺得成1800yen一個料理，得牛舌，飯同埋湯係有d貴law。當然不能否認呢d錢係值得花嘅。
飲飽食醉，仙台駅周圍有幾間大百貨公司，香港旅客真係不愁寂寞。至於對不好shopping如小弟來講，無咩搞作就只有喺站附近流連一吓。
無帶腳架，所以出現手震情況
順帶一提今晚嘅住宿Hotel Monte Hermana，一間喺Google Map上面都揾唔到嘅神秘酒店(如果用Street View睇會見到係地盤一個)。9800yen一間semi-double房連早餐，而且重有免費浴池，比起多美in(Dormy Inn)平，位置亦更近仙台駅，book嘅時間我心裡都有好大疑問，邊有咁筍？不過去到發現比我想像中更好，起碼位置上佢同仙台駅都係處於平台上，出入唔駛上落樓梯，而早餐亦係我呢次日本之旅最滿意嘅。此外個浴池都算ok(有女團友話女子果邊試過爆滿，慶幸男子呢邊又未試過喎)，所以我個人都頗推介嘅。
酒店實際外貌
當然房間嘅大小就唔好有太大期望
感想:
唔知點解，仙台俾我嘅感覺有d似札幌。不過暫時而言，小弟都係比較喜歡札幌多dd。
有用資料:
仙台旅遊資料: http://www.sentabi.jp/3000/30000000.html
JR East Pass: http://www.jreast.co.jp/tc/eastpass/index.htm
沒有留言:
發佈留言