仙台附近的松島被譽為日本三景之一，當然來得仙台就必定要一去。
(日本三景另外兩景係京都天橋立同埋廣島宮島，宮島我未有機會去，反而天橋立就唔知點解當年自己去京都時冇去。)
仙台附近有兩個JR駅係以「松島」為名嘅，其中一個係東北本線嘅松島駅，不過如果係去玩，其實坐仙石線去松島海岸駅比較近。
去松島重點項目係去松島灣睇吓豎立灣內嘅小島，其實即係生滿松樹嘅大石，一般會去坐遊船，繞住松島灣一周遊船河(亦有人會坐船去塩竈食壽司，順便睇風景)，松島海岸駅隔離有遊覽船嘅售票處，位位1400yen(有關遊覽船嘅問題稍後會再有注腳)，之後會人帶你去碼頭(小型船果邊)，上船前例牌要做嘅，就係買一包卡樂A蝦條(100yen一小包)，唔係自己食，而係稍後餵海鷗。
我哋呢隻遊覽船算係中小型size，裝咗成四五十人之後都有d擁迫。但係點解附近有d大架d嘅船呢？好似坐得會舒服d喎。(呢個其實係其中一個注腳)
上面是我們乘搭的小型遊覽船，下面是大型遊覽船
唔好理，開船嘞。船一開，成班海鷗已經知道有好嘢，即刻空群而出。咁d遊客亦唔會令佢哋失望，當然要表演先有得食。
是但影都可以影到大頭。
松島另一個好出名係蠔，一陣就會有機會再見。
形狀千奇百趣嘅小島，重有海蝕洞。
不過唔知係咪隻船細，浪又大，好快d浪就飛晒入船入面。小弟部相機雖然唔係咩貴嘢，但都怕整濕會壞，所以影得幾影都要收番埋，以免整壞。
船河其實只係四十零分鐘就玩完。
上番岸，附近廣場有好多攤檔wo。
原來係唔知咩感謝祭。
最吸引係燒蠔同埋帶子，250yen同300yen一隻，好好味。我哋每人食咗幾隻，已經大半飽嘞。
(其實呢度有個牡蠣小屋，睇描述好正，因為據稱係任食，不過只會喺秋冬兩季營業)
再行過幾步，有另一個坐大遊覽船嘅碼頭，係有冷氣等候室，洗手間同埋小賣部嘅。一睇，原來有定期時間表，重有優惠券可以攞。大船睇嚟好似舒服d，而且重平d。不過究竟我係咪俾人昆咗呢？我諗要問吓坐過大船嘅朋友先知囉。
優惠券其實可以喺http://www.matsushima.or.jp/2008coupon.html下載到㗎！
再行前些少，可以去到瑞嚴寺五大堂(要留意瑞嚴寺本身唔喺度)，佢豎立喺一個小島上，條紅色橋幾搶眼。
到此一遊相當然少不了。
至於瑞嚴寺本身，因為一來要行，二來要入場費，所以團友們決定唔去(O嘴中)。咁就沿住馬路行，走馬看花睇吓賣手信嘅舖頭。之前講過伊達政宗係仙台市嘅象徵，去到好多地方都會見到。
至於Keroro已經變成另一隻Hello Kitty，周圍去唔同地方扮呢扮路「cap水」是也。
午餐就去咗呢度 - 松島さかな市場，係一個兩層高嘅海鮮市場，可以喺裡面買唔同嘅食物，
有好多奇怪甚至係不知名嘅生物/食物。
亦有燒蠔，雖然比之前平(500yen三隻)，不過亦比較「削」。
食完飯，坐坐吓大家開始攰，於是決定邊度都唔去，行10分鐘去東北本線松島駅，跟住就返去仙台行街去了。
感想:
相信大家睇完會發出「啤」一聲，因為實在太快完嘞，連瑞嚴寺呢個「日本國寶」都無去，好似有d那個。只係，當您有一班「志在一遊」的團友一齊時，未必每個人會有相同嘅興趣，或者體力精力上會不一致，咁如果唔係分開行，就惟有協調一下(君不見呢d日本文化景點，其實香港朋友大多都無咩興趣)。或者自我安慰一下，就係如果係咁趕景點，咁同跟團就無咩分別囉。
(不過如果下次我再嚟，一定會去瑞嚴寺，同埋夾好日子去牡蠣小屋食放題)
小貼士:
松島觀光協會: http://www.matsushima-kanko.com/
小弟甚感興趣嘅牡蠣小屋下年度開放情況: http://www.matsushima-kanko.com/PDF/kakigoya%20w%202.pdf
沒有留言:
發佈留言